Mánadagin 2. november legði Bakkafrost fram frágreiðingina fyri triðja ársfjórðing 2026. Bakkafrost er størsta alingarfelagið í Føroyum, og tí siga tølini eisini nakað um føroysku alingina sum heild.

Stutt sagt: tøkan í Føroyum veksur, og eingin óvanlig deyðiligheit var á sjónum her heima í ársfjórðinginum. Kostnaðurin hækkar kortini, og Skotland er framvegis ein tung byrði.

Rakstrarúrslitið: 128 milliónir

Sambært KVF var rakstrarúrslitið hjá Bakkafrost-samtakinum 128 milliónir krónur í triðja ársfjórðingi. Í sama ársfjórðingi í fjør var tað 22 milliónir krónur. Tað er ein týðilig framgongd í mun til í fjør.

Tøkan í Føroyum

Bakkafrost tók 23.097 tons av laksi í Føroyum í triðja ársfjórðingi og 4.537 tons í Skotlandi. Í ársfjórðingsdagføringini frá 5. oktober sást, hvussu tøkan í Føroyum býttist á mánaðirnar (slógvaður laksur við høvdi):

  • Juli: 8.300 tons
  • August: 7.100 tons
  • September: 7.700 tons

Miðalvektin á laksinum í Føroyum var 5,0 kg í ársfjórðinginum. Í Skotlandi var hon 3,0 kg.

Fyrstu níggju mánaðirnar í ár hevur Bakkafrost tikið 75.000 tons í Føroyum. Tað er 24 prosent meira enn sama tíðarskeið í fjør.

Eingin óvanlig deyðiligheit í Føroyum

Eitt av teimum týdningarmestu tølunum fyri føroysku alingina er tað, sum ikki hendi. Bakkafrost skrásetti ongan kostnað av óvanligari deyðiligheit í aling á sjónum í Føroyum í triðja ársfjórðingi. Í Skotlandi var tann kostnaðurin 42 milliónir krónur, og av teimum stavaðu 33,5 milliónir frá alistøðum, sum vórðu tømdar í ársfjórðinginum.

Bakkafrost hevur eisini sett nýggjan fisk út. Í triðja ársfjórðingi vórðu 4,5 milliónir smolt sett út í Føroyum, og higartil í ár eru tað 14 milliónir. Í Skotlandi vórðu 2,9 milliónir sett út í ársfjórðinginum og 7,8 milliónir higartil í ár.

Kostnaðurin hækkar

Tað er ikki alt, sum gongur rætta vegin. Framleiðslukostnaðurin fyri hvørt kilo vaks sjey prosent, sambært KVF. Tað merkir, at tað kostar meira enn áður at framleiða hvørt kilo av laksi, og tað etur ein part av vinninginum, um prísirnir ikki hækka tilsvarandi.

Havsbrún og Skálavík

Fóðurvirkið Havsbrún, sum Bakkafrost eigur, hevði eitt serliga gott úrslit í ársfjórðinginum. Í triðja ársfjórðingi seldi Havsbrún 48.200 tons av fóðri. Bakkafrost væntar at framleiða 185.000 tons av fóðri næsta ár.

Smoltstøðin í Skálavík gongur sambært ætlan, sigur Bakkafrost. Rogn eru løgd inn í tveimum umførum, og úrslitini eru góð higartil.

Skotland er framvegis tungt

Í Skotlandi er Bakkafrost givið at keypa smolt frá uttanhýsis veitarum. Lítil tøka, lág miðalvekt og høgur eindarkostnaður ávirka tó framvegis fíggjarligu úrslitini har, sigur felagið.

Ætlanin fyri 2027

Bakkafrost ætlar at taka 97.000 tons av laksi í Føroyum og 28.000 tons í Skotlandi í 2027.

Fyri føroyska samfelagið hevur tað týdning. Meira laksur merkir meira útflutning og meira virksemi á sláturhúsum, á brunnbátum og hjá veitarum. Tað merkir eisini meira fóður frá Havsbrún.

Næsta ársfjórðingsfrágreiðingin frá Bakkafrost, fyri fjórða ársfjórðing 2026, kemur 15. februar 2027.

Keldur

Mynd: Katja Ano / Unsplash